All Categories - O Galo

julio cortázar-galicia: documental e palestra

12/13/2019

Imagem

A proxección do documental Julio Cortázar - Galicia, realizarase o próximo martes 17 de decembro de 2019, ás 19:30 horas na Libraría Couceiro, sita na Praza de Cervantes (antiga Praza do Pan ou tamén Praza do Campo) en Compostela. Contamos coa presenza do seu director Juan de la Colina, que fará unha intervención, seguida de coloquio.

O documental é un achegamento ao universo galego do escritor arxentino Julio Cortázar, un dos nomes máis destacados da literatura universal, e resulta moi interesante para afondar na intensa vinculación que o autor arxentino mantivo con Galicia, así como na presenza que a nosa terra tivo na súa literatura. Estreouse en 2014 no centenario do escritor.

A base desta curtametraxe experimental son as fotografías, as cartas e outros textos sobre as viaxes que Julio Cortázar e a súa primeira muller, a escritora Aurora Bernárdez, realizaron a Galicia nos anos 1956 e 1957, cun percorrido polos lugares que visitaron. O filme apóiase en material de arquivo facilitado polo Centro Galego de Artes da Imaxe, onde están os fondos fotográficos e fílmicos de Cortázar, (depositados no ano 2006 por Aurora Bernández no CGAI, para a súa custodia e conservación), pola Fundación Juan March e pola Fundación Luís Seoane.

Juan de la Colina é doutor en Belas Artes pola Universidade de Vigo, formado entre Barcelona, Madrid e Nova York. Como artista plástico, fixo exposicións e participou en feiras internacionais. Dirixiu cursos e seminarios sobre arte contemporánea, e foi docente no Instituto Europeo de Design de Madrid (1994-2002), profesor da Faculdade de Belas Artes (2002-2012), da Universidade de Vigo (2017-2019) e da Universidade da Coruña (2004-2013). Tamén realiza comisariados e deseño de mostras e catálogos para galerías de arte e institucións públicas. Desde 2005 codirixe os festivais de arte e música contemporánea ARTEC e MODULARTEC.

FICHA TÉCNICA do Documental JULIO CORTÁZAR-GALICIA
Dirección: Juan de la Colina              Textos: Julio Cortázar
Guión: Juan de la Colina, Andrea Vázquez e Damián Varela
Dirección de fotografía: Damián Varela
Montaxe: Andrea Vázquez         Producción: miramemira
Locucións: José Luis Ducid e Silvia Penas
Actores: Mark Wiersma e Jose Luis Ducid
Colabora: Consellería de Cultura, Educación e O.U. da Xunta de Galicia

roteiro feminista por compostela

12/10/2019

Imagem

O roteiro feminista por Compostela, colofón ás Xornadas Feministas realizadas no mes de outubro e novembro de 2019, adiado por mal tempo, celebrarase este sábado 14 de decembro ás 12 .00. A cita é na Praza 8 de Marzo de Santiago.

"NÓS, DE ONTE A HOXE: 100 ANOS DE HISTORIA"

12/8/2019

Imagem

A FEDERACIÓN DE ASOCIACIÓNS CULTURAIS GALIZA CULTURA, en colaboración co MUSEO DO POBO GALEGO, inaugurará o próximo día 11 de decembro, mércores, ás 17’30 horas, no claustro do Museo citado, a Exposición NÓS DE ONTE A HOXE: 100 ANOS DE HISTORIA.
GALIZA CULTURA conmemora así o centenario dunha iniciativa singular e decisiva na historia contemporánea da Galiza: o nacemento da revista Nós, cuxo primeiro número ve a luz o 30 de Outubro de 1920, revista de alta cultura que coloca a lingua, as artes e a ciencia galega nun nível privilexiado de calidade. Adiantámonos á celebración dunha publicación que é herdeira directa do espírito das Irmandades da Fala (1916), do renacido boletín A Nosa Terra (1917) e da I Asemblea Nacionalista de Lugo (1918), que son os seus antecedentes directos.
A exposición leva como lema: SER DIFERENTE É SER EXISTENTE, extraído do uso que del fai Vicente Risco en “Nós, os inadaptados”, e realiza un percurso pola significación e a obra dos seus principais persoeiros: VICENTE RISCO, director literario; CASTELAO, director artístico; RAMÓN OTERO PEDRAIO, ÁNXEL CASAL... e, con eles, a proxección que significou para artistas e escritores novos, así como a conexión co Seminario de Estudos Galegos (1923), outra iniciativa capital que marca o inicio dunha ciencia multidisciplinar en galego e sobre a Galiza.
É, pois, amplamente, o Grupo Nós o estudado, con atención especial e lóxica conexión xeracional, á figura de RICARDO CARVALHO CALERO, dedicatario do próximo Día das Letras Galegas 2020, testemuña excepcional desta época e estudioso constante da obra dos principais artífices do Grupo.
No acto da inauguración estarán presentes D. Xosé Regueira e D. Xurxo Couto, vicepresidente e deputado responsábel de Cultura, respectivamente, da Deputación Provincial da Coruña, que patrocina esta Exposición; D. Manuel Vilar, director do Museo do Pobo Galego; D. Carlos L. Bernárdez, comisario da Exposición; D. Luís Martínez-Risco, presidente da Fundación Vicente Risco, colaboradora da mesma; Dª Mª Antonia Pérez, presidenta da Asociación Cultural O Galo, de Compostela, e María Pilar García Negro, presidenta da Federación Galiza Cultura. A Coral Solfa interpretará dúas pezas musicais, para pór de relevo a importancia que o Grupo e a revista concedían á arte musical no conxunto da cultura galega.

xoán xesús González: o canteiro de sebil

11/24/2019

Imagem

"O canteiro de Sebil" é un documental sobre a polifacética figura de Xoán Xesús González, o canteiro de Sebil, quen, polos seus propios esforzos, chegou a ser mestre, avogado, xornalista, escritor, político, intelectual...

Canteiro de oficio, mestre e xornalista, foi pioneiro en intuír que o marxismo podía contribuír a explicar a opresión nacional de Galiza. Fundador de xornais como Amañecer -voceiro da Unión Socialista Galega, o partido que entre 1932 e 1933 avanzou a síntese de socialismo e galeguismo- ou El País Gallego -na rúa entre 1927 e 1931-, sempre adscrito ás esquerdas -pasou polo PSOE, Izquierda Republicana ou Vanguardia de Izquierda Republicana-, encabezou o chamado Terzo de Calo, grupo de obreiros armados que intentou defender a legalidade republicana en Compostela tras o golpe de Estado de Franco.

O 12 de setembro de 1936, o fascismo español, levantado en armas, asasinaba a Xoán Xesús González, canda a outros compañeiros, nas tapias do cemiterio de Boisaca.
Neste documental recupérase a memoria e difúndese a figura dun home honesto, humilde, un veciño dunha aldea galega perseguido e asasinado por combater con dignidade a barbarie do fascismo español.

O canteiro de Sebil é “unha ollada comunal” arredor de González. Un traballo producido por Quinteiro do Umia. Nel, entrevistas a historiadores e biógrafos altérnanse con reconstrucións dramáticas e a presenza de familiares de González e mesmo de quen o coñeceu en persoa.
O Leo tamén comparece cunha estremecida versión en galego de The Partisan, popularizada no seu día por Leonard Cohen.

SON DE GALICIA: O CANTO E A MÚSICA (DA ÉPOCA DAS IRMANDADES A HOXE)

11/24/2019

Imagem

"Son de Galicia" é una proposta do Consello da Cultura Galega coa fin de divulgar o importante papel que tiveron os coros galegos no desenvolvemento da cultura galega no século XX, baseándose nos coros tradicionais e históricos de Galicia: Toxos e Froles (Ferrol, 1914), Cántigas da Terra (A Coruña, 1916), Coral De Ruada (Ourense, 1918) y Cantigas e Agarimos (Santiago de Compostela, 1921).
Na exposición amósanse os diferentes aspectos que conforman o riquísimo mundo do folclore tradicional en distintos paineis de fotos e en vitrinas onde se mostran diversos documentos e obxectos: publicacións, manuscritos, fotografías, instrumentos, partituras, vestimenta, esbozos de decorados, recortes de prensa, videos....
Os contidos viran arredor de diferentes temas: os precedentes (Aires da Terra de Pontevedra); as actividades musicais e a recuperación da música tradicional, o teatro, as artes escénicas, o baile e a coreografía; a vestimenta, a cenografía e o deseño; o labor filantrópico e benéfico; a proxección exterior; o compromiso con Galicia e a súa identidade...

a aviación na provincia da coruña (1900-1936): palestra de xerardo rodríguez arias

11/14/2019

Imagem

"A AVIACIÓN NA PROVINCIA DA CORUÑA 1900-1936" é o título da palestra que impartirá Xerardo Rodríguez Arias o martes 26 de novembro de 2019 no Espazo Enocultural VIDE, VIDE!!! de Compostela.
O conferenciante ingresou no ano 1972 no Corpo Especial de Controladores da Circulación Aérea. No ano 1994 foi nomeado xefe de división do Centro de Control da Área Terminal do Noroeste, cargo que ocupou durante 10 anos. Actualmente está xubilado e adícase a investigar o pasado aeronáutico.

Os núcleos sobre os que xira a palestra "A aviación na provincia da Coruña" son os seguintes:
1.- Primeiras sociedades aeronáuticas na Península.
2.- Os primeiros voos en Galiza. Aviadores galegos.
3.- Proxecto liña aérea trasatlántica Galiza-EE.UU.
4.- Na procura de terreos axeitados para aeródromos.
5.- Creación aeroportos nacionais.
6.- Primeiros proxectos de liñas aéreas comerciais.
7.- Na procura dun campo de aviación naprovincia da Coruña.

Xerardo Rodríguez Arias publicou Cen anos de aviación en Compostela (2018), un minucioso traballo de investigación sobre o aeroporto de Lavacolla, no que se tocan temas como as demostracións dos globos aerostáticos contratados polos compostelanos para animar as festas; o primeiro voo en Compostela en 1912 por parte do aviador francés Maurice Poumet, que aterrizou nos campos de Boisaca; a xestación do aeroporto en 1932 da man dos seus impulsores Portela e Pena; a inauguración da primeira pista de Lavacolla en xullo de 1935 e a construción da primeira terminal de pasaxeiros en 1953, promovida en parte polo Cardeal Fernando Quiroga Palacios, daquela arcebispo de Santiago, de cara á celebración do Ano Santo Compostelano, para rematar na nova terminal de Lavacolla.

encontro poético con medos romero

11/14/2019

Imagem

O mércores día 20.11.2019, ás 19:30h na libraría Couceiro de Compostela, a poeta Medos Romero impartirá una palestra que se intitula: "Memoria e vivencias: encontro poético con Medos Romero". Explicará a súa evolución poética, recitará poemas "inspirados" en feitos relacionados coa guerra civil, coa cuestión feminina e coa natuleza e, para rematarmos o acto, dialogará co público.

Medos Romero nace en As Pontes en 1959). Actualmente reside en Valdoviño.
Diplomada en Enfermería pola Universidade de Santiago de Compostela, traballa como
enfermeira no Centro de Saúde das Pontes.
Poeta e narradora, acadou o Premio de Poesía Miguel González Garcés en 2006.
Entre a súa obra poética cómpre destacar Lenzo das madrugadas, A seitura dos tristes, O pozo da ferida, Do corpo e a súa ausencia, A ansia do lóstrego.
Dubido se matei a Lena e O trevo da sorte son os seus dous últimos títulos en narrativa.
Esencialmente poeta, a súa poesía vai desde a vivencia gozosa e o entendemento coa Natureza nas altas terras do Eume até o sufrimento. Vai da tenrura á dureza. A terra, as mulleres, a dor e a beleza constitúen os eixos fundamentais da súa obra.
Medos Romero é unha das voces poéticas máis persoais, imposíbel de encadrar nalgún grupo xeracional ou literario.

TERRAS de ARZÚA, MELIDE e TOQUES NATUREZA, CULTURA POPULAR, MEMORIA HISTÓRICA

11/8/2019

Imagem

A AC. O Galo organiza unha visita guiada para o sábado 16 – 11 – 2019: TERRAS de ARZÚA, MELIDE e TOQUES: Natureza, Cultura Popular, Memoria Histórica, á que vos convida a ti e as túas amizades.

TERRAS de ARZÚA, MELIDE e TOQUES
        NATUREZA, CULTURA POPULAR, MEMORIA HISTÓRICA
                                             Sábado, 16.11.2019

TODOS OS PARTICIPANTES DEBERÁN ANOTARSE NO CORREO ELECTRÓNICO comunicacion@ogalo.gal E INDICAR SE LEVAN COCHE E TEÑEN PRAZAS DISPOÑIBLES OU SE NON LEVAN COCHE E PRECISAN TRANSPORTE
NO PAZO DE BRANDESO NON ESTÁ PERMITIDO FACER FOTOGRAFÍAS

PROGRAMA:
09:00h: Xuntanza dos coches na rúa Valle Inclán de Santiago, a carón do Museo de Arte Contemporánea; desde este lugar sairán cara Arzúa todos os coches xuntos.
As persoas que vaian directamente a Arzúa e, por tanto, sen acudir ao punto de encontro da rúa Valle Inclán, deberán seguir as indicacións do punto 2.

09:50h: Visita guiada á Fonte Santa da capela do mesmo nome situada uns 4 km antes do pazo de Brandeso. Celso Magarinhos explicaranos as lendas que existen sobre esta fonte milagreira e persoas de ADEGA falarannos da carballeira. A continuación visitaremos un muíño de maquía e o seu muiñeiro, Xosé Conde, faranos unha demostración da moenda.
11:15h: Visita guiada polo profesor da USC, doutor Juan Varela Durán, ao pazo de Brandeso (nel desenvólvese a novela Sonata de Otoño, de Ramón del Valle-Inclán). Persoas de ADEGA falarannos das plantas e das árbores do seus xardíns e da finca lindeira.
13h: Visita guiada a Stª María de Melide. Explicacións a cargo de Xosé Antonio Vicente, coidador desta igrexa románica que conserva pinturas da época medieval.
14:15: Xantar (optativo) en Raxería Ramos, Avda. de Lugo, nº 44. Melide, teléfono 981-507667.
15:30h: Saída nos coches desde a Raxería Ramos para a fervenza de Toques
16:30h: Baixada a pé dos 3 km que levan ata a fervenza. Persoas de ADEGA explicarannos a flora e vexetación do treito polo cal camiñaremos.
17:30h: Desprazarémonos nos coches desde a fervenza ata S. Antoniño (6 km)
18h: Visita guiada á igrexiña altomedieval de S. Antoniño de Toques. As explicacións deste monumento correrán a cargo dun/ha integrante da AC. O Galo e as do seu contorno natural a cargo de membros de ADEGA. Ao rematar regrésase a Santiago de Compostela.
CONSIDERACIÓNS A TER EN CONTA:
1.      Este roteiro faise en coches privados e, como é norma na AC. O Galo, os seus socios teñen preferencia, para a asignación das prazas nos coches.
Poden anotarse persoas con coche ou sen coche. Quen teña no seu coche prazas libres a disposición doutras persoas, agradecemos que o comuniquen canto antes ao teléfono 659-683384. A quen leve o coche, pagaráselle a viaxe de ida e volta; neste caso, e desde Compostela, serán un total de 6 euros por persoa e, de ir no coche 4 ocupantes máis condutor/a, serán un total de 5 euros por persoa.
2. As persoas que vaian directamente, en Arzúa collerán a estrada que vai cara á Vila de Cruces, a uns 4 km, moi pouco antes do letreiro indicador que pon Brandeso, collerán unha pista á esquerda e a uns 250 m xa atopan a capela, o muíño e a Fonte Santa.
3.   Cadaquén pode xantar pola súa conta onde considere. Pero cómpre que estea na Raxería Ramos ás 15:30 h, para saír cara á fervenza e S. Antoniño.
4.   O menú na Raxería Ramos (tanto o vexetariano como o que ten carne) custa 11 euros por persoa, que se pagan ao entrar no comedor. Para xantar nela, o mesmo que para unicamente anotarse á visita guiada, hai que escribir un correo electrónico a comunicacion@ogalo.gal antes do 14 de novembro de 2019 ás 18h, especificando:
3A No caso de non xantar co grupo: Nome, apelidos, correo electrónico e número de teléfono de tod@s cant@s acudan á visita guiada sen ir xantar á Raxería Ramos.
3B No caso de si xantar na Raxería co grupo, indicaredes nome, apelidos, correo electrónico e número de teléfono e indicaredes a sobremesa e o primeiro prato elixido do menú con carne. De optar polo menú vexetariano, cómpre que digades cal das sobremesas escolledes.
3C Tamén debedes avisar con anterioridade ao día 15.11.2019 antes das 15h. se, despois de estar anotad@s, non ides vir ao xantar.
5. Os menú CUSTA 11 (ONCE) EUROS e inclúe:
MENÚ CON CARNE (11 EUROS): Auga, viño ribeiro, refrescos, pan e
1º PRATO: A elixir entre empanada de touciño entrefrebado con queixo ou macarróns con cogumelos. Cómpre escoller un ou outro.
2ª PRATO: Raxo e churrasco de porco con ensalada (as 3 cousas)
SOBREMESA: A elixir unha entre as seguintes: flan feito na casa ou torta que mercan fóra (de chocolate, de queixo ou torta xeada)
MENÚ PARA VEXETARIANOS (11 EUROS): Auga, viño ribeiro, refrescos, pan e
   1º PRATO: Macarróns con cogumelos.                2ª PRATO: Ensalada variada
   SOBREMESA: A elixir unha entre as seguintes: flan feito na casa ou torta que mercan fóra (de chocolate, de queixo ou torta xeada)
6. Rogamos que vos apuntedes canto antes en: comunicación@ogalo.gal precisando se ides xantar ou non co grupo, que menú escolledes e cal dos dous primeiros pratos, isto último no caso de preferir o que leva carne. Tamén que nos informedes se ides directamente para a Fonte Santa, lugar onde comezamos ás 09:50h esta visita guiada-roteiro. E lembrade que imos a unha zona fría e que andaremos polo campo, malia a que imos por terreo chan ou costa abaixo.

CENTENARIO DA ii ASEMBLEA DAS IRMANDADES DA FALA EN COMPOSTELA: 1919-2019

11/7/2019

Para celebrarmos o centenario da II Asemblea das Irmandades da Fala, na Libraría Couceiro, o mércores 13 de novembro ás 19.30 horas, o profesor e doutor Emilio Xosé Ínsua disertará sobre esta efeméride.
A conferencia xirará arredor do contexto, desenvolvemento e significado da segunda Asemblea Nacionalista, celebrada polas Irmandades da Fala en Compostela en novembro de 1919, hai agora exactamente cen anos. Repasaranse os debates afrontados, as figuras máis sobranceiras participantes e as conclusións adoptadas, con algunhas reflexións desde a perspectiva que nos brinda o tempo histórico transcorrido desde entón.

Imagem

Emilio Xosé Ínsua López (Viveiro, 1967) é doutor en Filoloxía Galega pola USC e profesor de Lingua Galega e Literatura no IES A Basella, de Vilanova de Arousa.
Fai parte dos consellos de redacción das revistas Aulas Libres (STEG), Nova Ardentía (Culturmar) e Revista Galega de Educación (Nova Escola Galega).
Mantén na rede o blog “A ínsua do Ínsua”, escribe acotío no Heraldo de Vivero e ten colaborado coas actividades e publicacións da Real Academia Galega, do Consello da Cultura Galega e de múltiplas asociacións culturais de todo o país.
Participou na confección de varios libros de texto para o Consorcio Editorial Galego e preparou a edición da obra inédita de Prados Ledesma e García Dóriga, así como de varias pezas teatrais de Antón Villar Ponte.
Publicou os libros de poesía Devalar das esperas (1995) e Acontece ás veces a ternura (2005), este último galardoado co premio Prados Ledesma do Concello de Viveiro.
Obtivo diversos premios de investigación, como o Irmandiños de Moeche (1996), o Ramón Piñeiro de Ensaio Breve (2004) e o Ánxel Fole (2002 e 2009). Tamén foi distinguido co premio Ramón Cabanillas polas librarías de Cambados (2008) e co premio do Libro Galego na modalidade de ensaio en 2019.
En colaboración co actual cronista oficial de Viveiro escribiu os volumes O primeiro Antón Villar Ponte (2003) e Maruja Mallo, de prometedora pioneira a artista universal (2010).
É autor, entre outros estudos, das monografías Sobre ‘O Mariscal’ de Cabanillas e Villar Ponte (2005); Antón Villar Ponte e a Academia Galega (2006); Orixe, peripecia e pertinencia do topónimo San Cibrao (Cervo) (2010); A nosa Terra é nosa! A xeira das Irmandades da Fala (1916-1931) (2016); Común temos a patria. Biografía dos irmáns Villar Ponte (2017), en colaboración con Xurxo Martínez González; Xosé María Díaz Castro, poeta en formación (2017) e O escritor viveirense Xoán Pla Zubiri (1874-1936) (2017).

Haz clic aquí para editar.

ROTEIRO FEMINISTA POLAS RÚAS DE COMPOSTELA

10/28/2019

POR CUESTIÓNS METEOROLÓXICAS, APRÁZASE O ROTEIRO PARA O SÁBADO 14 DE DECEMBRO DE 2019.

Imagem

O próximo día 9 de novembro, sábado, ás 12.00, haberá un Roteiro Feminista por Compostela, con poesía, música e teatro, ao que cómpre anotarse, por seren as prazas limitadas. Con este roteiro remataremos as xornadas "Noutrén: Feminismo poscolonial. Descolonizando corpos e territorios".

O encontro será na Praza 8 de marzo, ás 12.00 horas.
Guiarán este roteiro a escritora Eli Ríos e a cantante e regueifeira Alba María.
Teatro, música e poesía:
.- a actriz Mónica Caamaño interpretará o Monólogo de Morgana, de Begoña Caamaño.
.- Laura La Montagne SLAM POETRY recitará o poema de Rosalía A Xustiza pola man.
.- Alba María interpretará a Cantiga de Coralia e Maruxa e a Cantiga tradicional das leiteiras.
.- Mai Insúa e Laura La Montagne representarán o monólogo Sancha e María.
.- O Himno das mulleres, unha cantiga interpretada por Alba María, rematará o acto.