​Visita guiada que xorde da peza teatral baseada nas disposicións reais que a finais da idade media obrigaron ás monxas a abandonar dos mosteiros fundados por algúns nobres galegos. Esta obra teatral foi a gañadora do premio de teatro Álvaro Cunqueiro na súa vixésimo quinta edición e tamén do premio Follas Novas. Da man da súa autora, Carme Varela, a Agrupación Cultural O Galo organiza este roteiro no cal percorremos os espazos de Compostela relacionados con estes feitos.
Data e hora: Xoves, 3 de novembro de 2022, ás 17:30 horas.
Podes participar no roteiro enviando unha mensaxe para comunicacion@ogalo.gal antes do mércores 2 de novembro ás 22:00 horas, indicando o teu nome e apelidos e teléfono.

​Carme Varela (Duomes, A Baña, 1970).
Licenciada en Filoloxía galega completou a súa formación cun máster en xestión cultural na Universidade de Barcelona no 2000. A súa conexión co teatro comezou na época de estudante no grupo universitario EIS e na compañía Os Quinquilláns.
Compaxinou traballos na Fundación Castelao como secretaria técnica, con outros no campo da produción e distribución teatral coas compañías Ollomoltranvía e Mofa e Befa e servizos teatrais RTA. Foi directora de produción no Centro Dramático Galego e desde o ano 2007 está ligada á empresa de comunicación Atlantis Multimedia, onde participou en proxectos de publicidade ou na produción de documentais como “A Palabra Xusta” dirixido por Miguel Piñeiro.
O seu texto As desterradas foi creado como unha actividade para desenvolver na asociación de patrimonio medieval O Sorriso de Daniel da que é secretaria e que axudou a fundar en 2010.

​Os mosteiros medievais galegos marcaron a vida do País durante longos séculos, mais unha reforma iniciada polos Reis Católicos veu pór fin a aqueles días. As monxas galegas enfrontáronse a tres Papas diferentes e dúas raíñas para conservar o poder que tiñan. É un episodio da nosa historia poucas veces relatado e nunca cuestionado.
Quince mosteiros coas súas abadesas foron protagonistas dun grande conflito no que se mesturaba a relixión e a política.
As pedras de Compostela foron testemuñas daqueles feitos e agora vamos percorrelas para descubrir o que se nos ocultou durante longo tempo.

Deixádenos remar, ANA CABALEIRO, Xerais 2021
FINALISTA DO XXXVII PREMIO XERAIS DE NOVELA
 
A chegada dos primeiros habitantes a unha urbanización de chalets acaroados supón un cambio na rutina dos demais veciños e veciñas e xera conflitos.
A urbanización divide o barrio en dúas novas realidades, a da veciñanza de toda vida e a das novas vivendas. Nesta zona periférica vai convivir xente moi diversa que nos vai narrar as súas circunstancias e comparando con outras realidades, a da xente rica. Trátase do desencontro de formas de vivir, mais non dunha rivalidade polo territorio, senón da colisión entre dúas formas de vida que se converte nunha lenta e constante guerrilla de pequenas escaramuzas veciñais, na reafirmación do estatus comunitario dos humildes, na manifestación dos soños e loitas dependendo do lado do mundo en que habiten.
Os problemas cotiás das personaxes: o medo ao desemprego, ao desequilbrio mental e emocional, a dependencia, a precariedade, a emigración e tamén o desexo de ter unha vida mellor é o que imos atopar nen Deixádenos remar.
 
Reseña biográfica da autora
ANA CABALEIRO LÓPEZ (Saídres, Silleda, 1974) é licenciada en Xornalismo e cursou o Mestrado en Estudos Teóricos e Comparados da Literatura e da Cultura da Universidade de Santiago de Compostela, no que investigou sobre a contracultura e ciberactivismo. Actualmente dedícase á comunicación no sector da cultura e colabora con publicación como Nós Diario. Tamén traballou no ámbito da discapacidade intelectual e na cooperación ao desenvolvemento. Como autora formouse en obradoiros e cursos de escrita, sempre na procura de voces femininas. Froito das súas experiencias nace a compilación de relatos Sapos e Sereas (2017), a súa primeira obra publicada, a novela As Ramonas (2018) coa que gañou o preio de Novela Manuel García Barros e foi finalista do San Clemente. Tamén participou en libros colectivos de relatos Contra o vento (2018) e o Libro dos trens (2019). A novela Deixádenos remar (2021) foi finalista do XXXVII Premio Xerais de Novela. Xa no ano que andamos, recentemente foi gañadora da 1ª edición do Premio Exeria do Concello de Santiago.

O próximo martes 18 de outubro de 2022, ás 20:00 horas, a Agrupación Cultural O Galo organiza un coloquio no Centro Sociocultural do Ensanche (Rúa Frei Rosendo Salvado 14-16) intervindo Isabelle Kerdudo e Xoán Carlos Garrido, acompañando o dialogo coa proxección de imaxes ilustrativas. Os relatores farán un repaso das semellanzas entre a Bretaña e a Galiza, como complemento á exposición inaugurada o pasado 4 de outubro neste mesmo centro socio-cultural, A Bretaña que hai en Nós, sobre as cruces de pedra na Bretaña, inspirada no album homónimo de Castelao.
Ficades convidad@s, vós e as vosas amizades a este coloquio e á visita á exposición. @s asistentes recibiredes un catálogo sobre a exposición. Por este motivo convén anotarse con antecedencia, finalizando o prazo de inscrición o mesmo día do coloquio (18 de outubro) ás 16:00 horas.
A mostra “A Bretaña que hai en Nós” foi producida pola Asociación Cultural Vagalumes da Estrada, que ao igual que a nosa asociación fai parte da Federación Galiza Cultura e quere ser unha chamada de atención perante o desleixo que sofre o noso patrimonio material e inmaterial, moi evidente na súa vertente popular.

​En 1929 Daniel Castelao e Virxinia Pereira percorreron Bretaña durante catro meses. Alí, o intelectual e político rianxeiro estabelece contacto con colegas bretóns de diversas áreas de coñecemento e signo político e coa realidade social e cultural da Armórica. Froito destas vivencias é o album sobre os magníficos calvarios desa terra editado en 1930, un estudo considerado como o antecedente doutro que logo tirou do prelo sobre os cruceiros galegos, intitulado As cruces de pedra na Galiza.

A 4 de outubro de 2022 ás 20:00 horas no Centro Sociocultural do Ensanche, situado na rúa Frei Rosendo Salvado, 14-16, a Agrupación Cultural O Galo inaugura a exposición A Bretaña que hai en Nós. Organizada pola Asociación Cultural Vagalumes da Estrada, integrante, ao igual que a Agrupación Cultural O Galo, da Federación Galiza Cultura.
O comisario desta exposición, Xoán Carlos Garrido, estará na inauguración e responderá as preguntas dos asistentes sobre a mesma, que lembra o escrito por Castelao:
“As cruces de Irlanda, os Calvarios de Bretaña e os cruceiros de Galiza, son árbores de pedra. Pódese dicir que as cruces outas dos Fisterres naceron do imperativo do seu chan. Os cruceiros veñen de moi fondo e teñen as raíces moi debaixo da tona da terra podre que Cría cousas bonitas que duran pouco”.
A exposición permanecerá aberta até 12 de novembro de 2022.