A Agrupación Cultural O Galo convídate a ti e as túas amizades á mesa redonda e presentación do estudo O Libro Negro da Lingua Galega, da autoría de Carlos Callón. E tamén te convida a ti e as túas amizades ao roteiro que se realizará ao finalizar a presentación da publicación.
O acto decorrerá:
Data e hora: O xoves, 7 de xullo de 2021, ás 18:30 horas.
Lugar: Praza de Cervantes, mesmo na fronte da libraría Couceiro (haberá cadeiras e megafonía).
Intervirán: Carlos Callón, Ramón Mariño, María do Pilar García Negro e Francisco Rodríguez Sánchez.
O roteiro posterior polas rúas de Santiago será guiado polo propio Carlos Callón, facendo paradas nos lugares máis significativos en que aconteceron diversas accións en defensa da nosa lingua. A duración estimada do roteiro será por volta de 75 minutos.
Trátase dunha actividade aberta a todas as persoas que desexen participar, socias e socios da Agrupación Cultural o Galo, ou non, ao decorrer a mesma ao aire libre. Tan só terán preferencia para ocupar as cadeiras, as socias e os socios do Galo.
Prégase puntualidade e respectar as normas sanitarias sobre a COVID-19.

A Agrupación Cultural O Galo organiza unha visita dirixida ao Castelo da Rocha o sábado 18 de xuño. A actividade será guiada polo arqueólogo Mario César Vila e comezará ás 11:15 horas no punto de encontro do aparcadoiro existente unha vez atravesada a Ponte da Rocha desde Santiago con dirección ao Milladoiro.
Desde alí comezará un percurso a pé até o propio Castelo, onde principiará a visita ás 11:45 horas.
Trátase dunha visita, que para alén da explicación sobre o castelo da Rocha Forte, incluirá a da muralla do propio edificio, que facían parte das fortificacións de Santiago, xunto coa muralla da cidade.
O castelo é o maior da Galiza, mais ninguén lembra xa, virando nunha historia dun castelo maldito.
Ao longo de toda a súa existencia, o castelo da Rocha Forte e a muralla da cidade de Santiago erguéronse como imaxes de poder, autoridade e confrontación no señorío da Terra de Santiago. Alén de exerceren eficazmente como postos do control administrativo, fiscal, político e social das entradas e saídas da cidade, os dous baluartes foron escenario das loitas entre o señor feudal (o arcebispo) e os burgueses de Compostela.
A fortaleza da Rocha e a muralla son espazos privilexiados para contar a historia da cidade durante a Idade Media, por esta razón a Agrupación Cultural O Galo organiza esta visita dirixida para as súas socias e os seus socios, podendo vir acompañados até completar o aforo permitido.
Para coñecermos o número de asistentes e participar na visita é preciso enviar unha mensaxe a comunicacion@ogalo.gal antes do 17 de xuño de 2022 ás 22 horas, indicando nome, apelidos e teléfonos de todas as persoas participantes.
As socias e os socios do Galo recibirán un exemplar do libro editado sobre o castelo polo Concello de Santiago.

Galiza Cultura e a Agrupación Cultural O Galo (integrante desa Federación) realízanlle unha homenaxe a unha das figuras máis senlleiras do teatro galego, a Manuel Lourenzo, autor, director, actor, produtor, editor e docente.
Para alén disto, Manuel Lourenzo, participou como intérprete en numerosos audiovisuais, series de televisión e filmes. Tamén foi co-fundador da Escola Dramática Galega e dos seus Cadernos de Teatro, puxo en funcionamento e dirixiu o “Teatro Luís Seoane”, no cal se representaron obras en galego de grandes autores internacionais e recibiu os máis importantes premios do noso teatro e o que anualmente concede aos dramaturgos o Ministerio de Cultura do Estado español.
Nesta HOMENAXE A MANUEL LOURENZO tamén se presentará a súa OBRA COMPLETA, recentemente publicada pola Federación Galiza Cultura e da que fan parte sete tomos nos que se recompilan toda a súa escrita.
A HOMENAXE A MANUEL LOURENZO levarase a cabo:
Data e hora: Martes, 14 de xuño de 2022, ás 19:30 horas.
Lugar: Salón-Teatro (sede do Centro Dramático Galego). Rúa Nova número 34. Santiago de Compostela.
E nela interveñen:

• Susana Dans, actriz.​
• Xosé Paulo Rodríguez, director do Teatro Rosalía Castro da Coruña.
• Quico Cadaval, actor.
• Coral Solfa.
• Francisco Núñez, director do Centro Dramático Galego.
• Xosé Manuel Carril, presidente da Federación Galiza Cultura.
• Brandán Lourenzo, gaiteiro.

Ficas convidad@ ti e un acompañante. De vir, é preciso enviar unha mensaxe a comunicacion@ogalo.gal antes do 12 de xuño de 2022 ás 22h, indicando nome, apelidos e teléfonos. En breve informarase sobre a maneira de apañar os billetes para asistir a esta homenaxe.
​No hipotético caso de anotarse socios no último momento e non haber butacas dispoñíbeis, est@s soci@s desprazarán @s non soci@s anotad@s en último lugar, feito que sería comunicado.