SOLSTICIO DE INVERNO NA EIRA DA XOANA o sábado, 21 de decembro 
A FESTA DO SOL sen luces artificiais!!

Na festa do sol, da luz, debe haber música, por suposto; debemos papar algo especial por ser festa, faltaba máis; pero todo isto podémolo facer ao calor e coa luz agarimosa do lume. Debe ser co gasto imprescindible de enerxía e cos produtos de preto, coa música e coas palabras dos nosos xenerosos amigos e amigas que recolleron os ecos que veñen de moi lonxe e pérdense na noite dos tempos.
Festexamos o ano que nace, os días que empezan a medrar, o frío que ven reparador e preciso; celebramos o poder estar e gozar da compaña da xente boa que se achega ata a plena natureza e teremos un recordo para os nosos defuntiños, que sempre deben estar presentes.
É dicir, facemos todo o contrario da moda, da moda da lucería cegadora, da música estranxeira, dos costumes importados, da comida sofisticada, do tabú  do pasamento e do consumo desbordante. 
E así o queremos facer, porque nos peta e porque queremos que a nosa festa sexa o máis natural, ecolóxica e galega posible.
Programa da celebración do solsticio na Eira da Xoana:
17 h: preparación dos fachos, do toro de Nadal, do boneco que representa o ano vello...
18 h: saída en grupos cara ao Cotón e cara ao castelo de Pambre para despedir o sol.
19 h: música, palabra e queima do toro
20 h: cea (cada quen trae a súa comida para compartir). Degustación do doce “toro de nadal”.
21 h: visita do Apalpador e festa: teatro (Fantoches Baj), música ( Bico da Balouta, Bico do mar...)

O roteiro feminista por Compostela, colofón ás Xornadas Feministas realizadas no mes de outubro e novembro de 2019, adiado por mal tempo, celebrarase este sábado 14 de decembro ás 12 .00. A cita é na Praza 8 de Marzo de Santiago.

A FEDERACIÓN DE ASOCIACIÓNS CULTURAIS GALIZA CULTURA, en colaboración co MUSEO DO POBO GALEGO, inaugurará o próximo día 11 de decembro, mércores, ás 17’30 horas, no claustro do Museo citado, a Exposición NÓS DE ONTE A HOXE: 100 ANOS DE HISTORIA. 
GALIZA CULTURA conmemora así o centenario dunha iniciativa singular e decisiva na historia contemporánea da Galiza: o nacemento da revista Nós, cuxo primeiro número ve a luz o 30 de Outubro de 1920, revista de alta cultura que coloca a lingua, as artes e a ciencia galega nun nível privilexiado de calidade. Adiantámonos á celebración dunha publicación que é herdeira directa do espírito das Irmandades da Fala (1916), do renacido boletín A Nosa Terra (1917) e da I Asemblea Nacionalista de Lugo (1918), que son os seus antecedentes directos.
A exposición leva como lema: SER DIFERENTE É SER EXISTENTE, extraído do uso que del fai Vicente Risco en “Nós, os inadaptados”, e realiza un percurso pola significación e a obra dos seus principais persoeiros: VICENTE RISCO, director literario; CASTELAO, director artístico; RAMÓN OTERO PEDRAIO, ÁNXEL CASAL... e, con eles, a proxección que significou para artistas e escritores novos, así como a conexión co Seminario de Estudos Galegos (1923), outra iniciativa capital que marca o inicio dunha ciencia multidisciplinar en galego e sobre a Galiza.
É, pois, amplamente, o Grupo Nós o estudado, con atención especial e lóxica conexión xeracional, á figura de RICARDO CARVALHO CALERO, dedicatario do próximo Día das Letras Galegas 2020, testemuña excepcional desta época e estudioso constante da obra dos principais artífices do Grupo.
No acto da inauguración estarán presentes D. Xosé Regueira e D. Xurxo Couto, vicepresidente e deputado responsábel de Cultura, respectivamente, da Deputación Provincial da Coruña, que patrocina esta Exposición; D. Manuel Vilar, director do Museo do Pobo Galego; D. Carlos L. Bernárdez, comisario da Exposición; D. Luís Martínez-Risco, presidente da Fundación Vicente Risco, colaboradora da mesma; Dª Mª Antonia Pérez, presidenta da Asociación Cultural O Galo, de Compostela, e María Pilar García Negro, presidenta da Federación Galiza Cultura. A Coral Solfa interpretará dúas pezas musicais, para pór de relevo a importancia que o Grupo e a revista concedían á arte musical no conxunto da cultura galega.