O próximo sábado, 9 de xuño de 2018, Carlos Callón farános un percorrido literario pola Compostela medieval e moderna seguindo os textos das cantigas medievais galego-portuguesas.

SABÍAS QUE....
1.      A metade dos textos europeos medievais que tratan sobre lesbianismo están escritos en galego?
2.      Un deses textos fala dunha parella, Sancha e María, e que nos indica mesmo a rúa de Compostela onde moraban?
3.      O bispo que converteu Santiago en sé episcopal foi acusado de sodomía e que, a raíz diso, disque realizou un milagre? E sabías que a súa historia foi recuperada na década de 1940 por Lorenzo Varela e Luís Seoane como alegato contra a homofobia?
4.      O prior do mosteiro de San Domingos de Bonaval no século XIII era coñecido polo seu amor por outros homes?
5.      No reino de Galiza tiveron moita devoción sant@s transxénero, que seica naceran ou morreran aquí?
6.     As pedras de Santiago agochan historias que falan de relacións de amor e desexo entre homes, como a desventurada de Paio de Albeos, ou a apaixoada de David e Xonatán?
 
  ¡COÑEZAMOS  TAMÉN  ESTA  PARTE  DA  NOSA  HISTORIA! 

 A AC. O Galo convídate a ti e as túas amizades a participar no roteiro Homosexualidade en Compostela na Idade Media, que terá lugar o sábado 9 de xuño de 2018, ás 12h. Será guiado por Carlos Callón quen realizou a súa tese de doutoramento sobre As relacións sexoafectivas intermasculinas e interfemininas no trobadorismo galego.
 A data límite para anotarse é o mércores 6 de xuño de 2018 ata ás 24h. E como sempre teñen preferencia as/os socias/os da AC. O Galo e acompañentes.
Para anotarse: ogalo.ac@gmail.com
Indica: nome, apelidos, DI e teléfono. 

A cita é o sábado 9 de xuño de 2018 ás 11:50h nas escadas do convento de San Domingos de Bonaval.

De ter interese en asistir,  agradecemos que te apuntes axiña, pois precisamos saber con antelación o número de autoguías que precisamos e para comunicarche con tempo a admisión no roteiro Homosexualidade  en  Compostela. Lésbicas e sodomitas na Compostela medieval e moderna

CARLOS CALLÓN Licenciado en filoloxía galega e portuguesa pola USC, actualmente traballa como profesor.
Foi concelleiro do BNG en Ribeira, onde naceu en 1978, membro do Consello Asesor de RTVE en Galicia e presidente da Mesa pola Normalización Lingüística (desde 2002 a 2014).
Desde 2006, preside a Fundación Vía Galego e a federación estatal Diverslinguae desde 2008.
Autor de traballos sobre sociolingüística e estudos literarios, publicou tamén Unha historia que nos pertence sobre Lorenzo Varela e En castellano no hay problema, onde aborda a situación da nosa lingua nos últimos tres lustros.

En 2011 gañou o XVI Premio Vicente Risco de Ciencias Sociais coa obra "Amigos e sodomitas. A configuración da homosexualidade na Idade Media", recollendo, entre outra documentación, un documento de 1061 do Tumbo de Celanova, polo que Pedro Díaz e Muño Vandilaz suscribían unión en Rairiz de Veiga.
Autor de ensaio e de poesía, defensor dos nosos dereitos como falantes, esta vez guiaranos pola Compostela medieval.

• 
  

A AC. O Galo convídavos a pasar este sábado na Eira da Xoana, en Ramil-Agolada, un lugar practicamente incontaminado que se atopa case no centro xeográfico de Galiza.
Non perdades esta ocasión de “limpar” as vías respiratorias, aínda que sabemos que a nosa agrupación irá a este sitio tan especial en máis ocasións, en actos en colaboración da AC O Galo con  Eira da Xoana-ADEGA.
Programa de actividades:

1.  Xantar comunitario ás 14:30h. Cadaquén levará a súa propia comida e sobremesa que alí compartimos entre todas/os.
2. Espazo lúdico-cultural Mulleres nas letras, na música, na diversidade… que empezará ao rematar de xantar. No cartaz que anuncia o acto está o nome das persoas participantes na actividade.
3. Cando marchemos o noso retorno poderemos aplicar o dito de  “Mens sana in corpore sano”.

Datos GPS para atopar a Eira da Xoana:  42°50’29″N 7°58’40″W  ou  42.8413889, -7.9777778 

A  Agrupación Cultural O Galo organiza a presentación de
Memorias dunha Vaca Marela,
un libro da autoría de Afonso Eiré.

O xornalista e escritor Afonso Eiré realiza un percorrido polo acontecido nas explotacións gandeiras galegas desde os anos setenta do pasado século.
Analiza a adaptación das explotacións gandeiras ás esixencias da Unión Europea e o seu desenvolvemento conforme foi mudando a política económica desta institución,
dos gobernos do Estado español e da Xunta de Galiza.  
Tamén reflexiona sobre a realidade da súa situación actual. 

Lugar: Libraría Pedreira. Rúa do Home Santo, nº 55. Santiago de Compostela            
Data e hora: Martes, 15 de maio de 2018, ás 20:30h

Participarán:  
Alfonso Eiré, autor do libro
Esperanza Delgado (representante da AC. O Galo)
Xosé Luis Rivas “Mini”, deputado no Parlamento de Galiza
Francisco Rodríguez Iglesías, presidente de Hércules Edicións