O seis de xuño, na Libraría Couceiro falaremos arredor de Luísa Villalta e a súa obra na compaña de Prudencio Viveiro, en representación da editorial e das coordinadoras deste libro:

Montse Pena Presas
(Sada, 1981). Doutora en Filoloxía pola Universidade de Santiago, actualmente é profesora de Didáctica da Lingua e da Literatura na mesma universidade. Ten publicado diversos traballos de investigación e ensaios divulgativos, sobre todo centrados na literatura infantil, na educación literaria e nos estudos de xénero, os seus ámbitos de especialización.
Académica correspondente da RAG, en Edicións Laiovento publicou unha parte substancial da súa tese de doutoramento, na obra Feminismos e literatura infantil e xuvenil en Galicia (2018). Outros dos seus libros son Intempestiva. Unha biografía (literaria) de Xela Arias (2021) ou A voz insurrecta. María Victoria Moreno, entre a literatura e a vida (2018).
 
Mercedes Queixas Zas
(A Coruña, 1968) Licenciada en Filoloxía Hispánica pola UDC, exerce como profesora de lingua e literatura galega no ensino secundario. Foi secretaria xeral da AELG e é académica correspondente da RAG. Autora de ensaios de carácter divulgativo dirixidos ao público escolar, ademais de estudos centrados na investigación lingüística e literaria galega.
Partituras, poemario dialogado co poeta Xoan Carlos Domínguez Alberte, saíu do prelo en Edicións Laiovento en 2019, editora que ten acollido outras publicacións da autora como Frei Martín Sarmiento. O inicio da recuperación da conciencia galega; Ramón Piñeiro. A expresión cultural dunha estratexia política ou Lois Pereiro. A urxencia poética dun futuro alleo.
 
Na contracapa do libro podemos ler: "Esta obra reúne 12 voces arredor da vida, mais, sobre todo, da obra de Luísa Villalta. Todas buscan provocar un ruído: facer pensar arredor da poeta, da narradora, da ensaísta, da dramaturga, da profesora, en definitiva, da muller que Villalta foi. Estas páxinas abalan entre a lembranza, o estudo rigoroso, a contextualización da súa produción, a reivindicación dos seus compromisos, o agarimo das amigas, a posta en valor do seu culturalismo e a visibilización do pouso que deixou en diferentes ámbitos. Nelas, a lectora e o lector atento poderán descubrir por si mesmos as arestas dunha autora que non renunciou a ningún xénero literario nin a comprometerse coa sociedade que lle tocou vivir. Marta Dacosta, Francisco Fernández Naval, Alexandrina Fernández Otero, Carmen Fernández Pérez-Sanjulián, Rosalía Fernández Rial, Maribel Longueira, Antía Otero, Roberto Pascual, Montse Pena Presas, Ana Pillado, Susana Sanches Arins e Cesáreo Sánchez Iglesias achégannos a unha das poucas creadoras galegas que, á vez que se introduciu no ámbito da ficción, reflexionou sobre ela. Escoitemos, porque todos os ruídos resultan ser provocadores".
 

O xoves vindeiro, 30 de maio, ás 17:55h.,  na Cidade da Cultura (no Museo Centro Gaias) faremos unha visita guiada pola exposición TESOUROS REAIS na que teremos a oportunidade de ollar pezas relacionadas con Terra Santa custodiadas no Terra Sancta Museum, e algunha no convento de San Francisco de Compostela. Durará 1 hora aproximadamente e as explicacións correrán a cargo  dun guía asignado polo museo para tal mester.

A Agrupación Cultural O Galo convídavos á CONVERSA CON BIEITO LOBEIRA centrada en discernir as posibilidades de termos “Outra Unión Europea”.
Esta actividade, que se levará a cabo na Libraría Couceiro o 22 de maio ás 19:30 horas,   está pensada para que os asistentes pregunten canto desexen sobre o funcionamento e comportamento dese organismo supranacional, que tanto inflúe no noso día a día. A conversa co candidato número dous no listado do BNG ás próximas eleccións europeas, será moderada por Lucía Veciño  graduada en historia e tralladora da Fundación Galiza Sempre,   nela as vosas preguntas ocuparán o 80% do tempo, xa que se formulou como un diálogo para contrastar criterios, ollar a viabilidade de cambios e valorar as futuras actuacións desa poderosa entidade que afecten a Galiza. 
Bieito Lobeira Domínguez, naceu en Seixo (Marín), 1968. Membro da Executiva Nacional do BNG, e candidato nas eleccións ao Parlamento europeo. Foi deputado no Parlamento de Galiza.
Resumo da intervención:
O BNG mantivo desde sempre unha posición crítica ante o  modelo económico e social que representa a UE, que se manifestou na oposición á entrada no Mercado Común Europeo e en posicións contrarias ao Tratado de Maastricht e ao referendo da Constitución Europea.
Este proceso estivo e está ao servizo de intereses económicos de grandes corporacións e oligopolios, é lesivo para as maiorías sociais e, no caso de Galiza, provocou consecuencias dramáticas sobre os principais sectores produtivos, de perda de emprego, de freo ao aproveitamento das nosas potencialidades económicas e, por tanto, ás posibilidades de promover un desenvolvemento económico autocentrado.
Mais, ao mesmo tempo, esta foi tamén unha estrutura profundamente antidemocrática, negando os dereitos dos pobos e mantendo unha política internacional servil cos Estados Unidos e a OTAN, tal e como se comproba no caso da Palestina.
A aposta debe ser a dunha Europa que tome como base a vontade democrática das nacións e dos pobos, nunha Europa social e realmente democrática. A Galiza ten que poder decidir libremente sobre os seus intereses e tamén ter capacidade de falar e negociar directamente nas institucións europeas, internacionais ou con terceiros países.