Representación teatral do AUTO DOS SIMULADOS DA CARAVILLA de Manuel María. Produción do Grupo de Teatro da S.C: Medulio, dirixido por Francisco Rodríguez. A estrada é gratuíta.
Data e hora : sábado, 7 de marzo, ás 19:00 h.
Lugar: Teatro Principal.
Retirada das entradas na Zona C (Praza de Cervantes). Dúas por persoa.
Horario: a partir do 4 de marzo, de 11 a 14h. e de 16 a 19h.
 
O auto dos simulado da Caravilla de Manuel María
Adaptación cómica, en clave de esperpento, da obra de Manuel María (1978) sobre o chamado tributo das cen doncelas que os cristiáns debían pagar aos mouros. A peza ofrece unha sátira da figura de Santiago como guerreiro e da súa suposta aparición milagrosa na batalla de Clavixo, lenda empregada desde a denominada “Reconquista” como elemento político na construción de España. Mestúranse personaxes históricos, como Carlo Magno, co almirante Balán, inspirado nos libros de cabalaría reunidos en A historia do emperador Carlo-Magno e dos doce pares de Francia, para ofrecer unha visión máis crítica e verosímil dos feitos. A obra convértese así nunha proposta divulgativa que reivindica a diversidade cultural do medievo fronte a unha historiografía monolítica que tende a uniformar a realidade da Península Ibérica, Europa e África. (Fonte: Nós diario).

A AC O Galo organiza unha táboa redonda sobre as  CONSECUENCIAS DOS CAMBIOS NA LEI DE PATRIMONIO DE GALIZA. A entrada é libre até encher.
Data e hora : venres, 6 de marzo, ás 19:30 h.
Lugar: centro socio cultural do Ensanche (rúa Frei Rosendo Salvado nº 14)
 
Intervirán:
Mercedes Queixas
Deputada do Parlamento de Galiza
Xosé Penas
Deputado de Patrimonio da Deputación da Coruña
Ruth Verela
Profesora na UdC e presidenta da delegación do COAG na Coruña 
Teresa Nieto
Funcionaria do corpo especial de arquitectos da Xunta de Galicia

As modificacións introducidas na lei de Patrimonio Cultural de Galicia que entraron en vigor o 1 de xaneiro de.2026 estableceron unha nova atribución das competencias para a autorización das intervencións que realicen en bens catalogados con protección estrutural e ambiental, ou nas súas contornas de protección e zonas de amortecemento. Coa nova redacción da lei non queda garantida de maneira suficiente e eficaz a conservación e protección do patrimonio cultural de Galicia. 
 
Nun contexto como o actual de alta presión social, económica e política sobre as políticas urbanísticas, de vivenda e de explotación produtiva do territorio, as modificacións introducidas parecen responder máis á vontade de liberalizar a xestión do patrimonio cultural que á de simplificala. Estas medidas poden poñer en risco de perda, destrución ou deterioración irreversible moitos dos bens parte da nosa herdanza cultural e que deberiamos legar ás seguintes xeracións.

Presentación do caderno 170 anos do Banquete de Conxo
A Fundación Galiza Sempre e a Agrupación Cultural O Galo presentan o vindeiro luns 2 de marzo o caderno 170 anos do Banquete de Conxo no mesmo barrio no que se celebrou o acto hai 170 anos.

 Este ano cúmprense 170 anos do Banquete Democrático de Conxo, e a FGS en colaboración coa A.C O Galo decidiron dedicar un novo número da colección Efemérides de Galiza a este acontecemento de fonda carga simbólica. O caderno está elaborado por Xoán Costa, presidente da Asociación Socio-Pedagóxica Galega (AS-PG) durante case dúas décadas e do Consello de Administración de Sermos Galiza S.A na actualidade, quen ofrece un rigoroso percorrido polo contexto histórico e a significación política deste importante episodio da nosa historia.
O Banquete Democrático de Conxo foi un acto consciente de rebeldía contra a orde económica e social estabelecida. Tivo unha enorme carga política, unha clara compoñente antimonárquica, republicana e crítica co capitalismo liberal. Constituíu tamén un importante xesto simbólico á vista de toda a sociedade, no cal a posta en escena, a poesía e as intervencións políticas en forma de brinde e discursos estaba trufados por ideas de xustiza social, progreso e liberdade. En definitiva, representou unha afirmación da fraternidade democrática e da significación do traballo e das clases populares, así como a reivindicación dunha sociedade nova capaz de superar as barreiras sociais herdadas e o papel subordinado de Galiza no Estado español.
Por iso, este luns, as entidades organizadores lembraremos nun acto que se celebrará no CSC Aurelio Aguirre de Conxo ás 20 horas, unha das efemérides contemporáneas máis importantes da historia de Galiza e da propia cidade de Compostela. No acto contaremos coa alcaldesa de Compostela, Goretti Sanmartín e o autor do caderno, Xoán Costa. A presidenta da A.C O Galo, María Antonia Pérez, presentará e moderará o acto.
​As persoas asistentes serán agasalladas cun exemplar da publicación.

A AC. O Galo presenta o libro Personaxes da Galiza Medieval IV. Con el continuamos a materializar a nosa contribución na recuperación da memoria histórica de Galiza.

Coa publicación do numero cinco da serie que comezou no ano 2021 con Galicia. Reis e Reino temos como obxectivo esparexer o noso pasado valéndonos da actuación de mulleres e homes que, ao defender os seus propios intereses, tamén defenderon os de Galiza. A temporalidade de Personaxes da Galiza Medieval IV, ao igual que a dos libros anteriores, circunscríbese aos séculos nos que a nosa Terra era un reino de seu, e contaba cunha estrutura económico-social protofeudal e logo feudal, que hoxe consideramos definitoria desa época. Cínguese a ese período no que a nosa alta nobreza tiña posto os ollos en formalizar un proxecto político-económico “atlantista” fronte ao, digamos, “mediterranista” impulsado por Aragón e Castela, en especial ate finais do século XV.
Os textos deste volume están escritos polos seguintes autores, o limiar, “A Galiza Medieval do século XV”, por Francisco Rodríguez, “Fernan Eanes dem Limia“ e “Pedro Alvarez de Soutomaior“ por Suso Vila, “Nuno Freire de Andrade” por Ricardo Pichel,  “Bernal Eans de Moscoso“ e “Lope Sanchez de Moscoso“ por Carlos J. Galbán Malagón, “Diego de Lemos e Maior de Ulloa“ e “Dona Urraca de Moscoso” por Miguel Garcia-Fernandez e “Pedro Pardo de Cela” por Alexandre Peres Vigo.

Agasallaremos cun exemplar ás persoas asistentes.  De querer vir, hai que anotarte en comunicacion@ogalo.gal antes do xoves 26 de febreiro de 2026 ás 17h., indicando o nome e apelidos. Mandaremos un correo de confirmación indicando que tes praza.

O acto será: 
Lugar:  Museo das Peregrinacións. Praza das Praterías 
Data, hora e duración:  Venres, 27 de febreiro de 2026, ás 20h. Durará aprox. 1:30h. 
Intervirán: Unha representante da AC. O Galo, tres dos autores do libro: 
Francisco Rodríguez, prof. doutor reformado, escribe sobre o contexto social do s. XIV e do segundo terzo do XV. 
Ricardo Pichel, profesor no Dpto. de Teoría da Literatura da UNED, escribe sobre Nuno Freire de Andrade.
Suso Vila, escribe sobre o tema das súa tese de doutoramento: Pedro Álvarez de Soutomaior (Pedro Madruga). 
Por outra banda, tamén falará Natividade  González Deputada Provincial de Cultura da Exma. Deputación da Coruña.