Blog Archives

reivindicarmos Carvalho calero

19/1/2020

Para celebrarmos que este ano as Letras se adican a Ricardo Carvalho Calero, a A.C. O Galo organiza unha palestra-presentación baixo o título "Reivindicarmos Carvalho Calero", baseándose na obra colectiva “Hei de entrar no meu povo: Reivindicarmos Carvalho Calero”, Edicións Embora, 2019.
O acto contará coa presenza de dous dos autores desta obra colectiva, os profesores Bernardo Máiz Vázquez e Xosé María Dobarro Paz, acompañados de Luís Gonçález Blasco, Foz, e terá lugar o xoves 23 de xaneiro de 2020 ás 20:30 horas no local do "Vide, Vide!" na Rúa da Fonte de Santo Antonio, en Compostela.
O profesor e investigador XOSAÉ MRÍA DOBARRO PAZ (Ferrol Vello, 1950) licenciou en Filosofía e Letras (Románicas-Español) na Universidade de Santiago en 1973 e doutorouse nas mesmas titulacións e Universidade en 1980, coa tese Alberto Camino (1820-1861): poeta galego, dirixida polo Profesor Doutor don Ricardo Carvalho Calero. Licenciou tamén en Filoloxía Hispánica (galego-portugués) en 1979.
Profesor Titular de Filoloxía Galega e Portuguesa da Universidade de Santiago en 1984, en 1993 obtivo praza de Catedrático da Universidade da Coruña.
Entre outros cargos, ocupou os de Subdirector do Colexio Universitario da Coruña (1985-1990); Vicepresidente do Claustro da USC (1987-1989); Director do Departamento de Filoloxías Francesa e Galego-Portuguesa da UDC (1990-1993) e Decano da Facultade de Filoloxía da UDC (1996-1999). Dirixiu 15 teses de doutoramento e outras tantas de licenciatura e impartiu docencia na Universidade da República Oriental del Uruguay (Montevideo), na City University of New York, na
Universidade da Habana e Universidade Estadual do Ceará (Fortaleza). Ten publicado numerosos traballos, principalmente de literatura galega contemporánea. Na actualidade é Profesor Honorario da UDC.
O profesor e historiador BERNARDO MÁIZ VÁZQUEZ (Ferrol, 1950), veciño de O Seixo, Mugardos. Licenciado en Filosofía e Letras (1973), doutor en Historia (1984), foi profesor e catedrático de ensino medio (1974-2010).
Asesor histórico de varias producións cinematográficas, é autor dunha destacada produción bibliográfica sobre historia contemporánea e patrimonio marítimo galego.
Recibiu no 2008 o Premio Didáctico da Fundación Fraguas do Museo do Pobo Galego e no ano 2010 o Premio Murguía ao Labor e Mérito Historiográficos, outorgado pola Asociación Galega de Historiadores.
A súa penúltima achega como investigador é Carvalho Calero e a política (1926-1990), na obra colectiva “Hei de entrar no meu povo: Reivindicarmos Carvalho Calero”, Edicións Embora, 2019.
É coordinador e coautor do volume "Cando fun Carballo en Ferrol, aproximación a Carvalho Calero", Club de Prensa de Ferrol-DXPL, 2020, en edición.

Esperandio a vosa asistencia, un saúdo,
A.C. O Galo

0 Comentários

palestra de Victorino pérez prieto sobre a xeración nós

11/1/2020

0 Comentários

Esta palestra, complementaria á exposición "NÓS DE ONTE A HOXE: 100 ANOS DE HISTORIA", organizada pola FEDERACIÓN DE ASOCIACIÓNS CULTURAIS GALIZA CULTURA, celebrarase o próximo mércores, 15 de xaneiro de 2020, ás 20:30 horas, no Vide, Vide!!!, sito na rúa da Fonte de Santo Antonio de Compostela.

Impartida polo profesor Victorino Pérez Prieto, versará sobre a importancia e actualidade do grupo “Nós” na cultura galega: Otero Pedrayo, Risco e Castelao, tocando os seguintes puntos:

1. A xeración “Nós” é a máis senlleira das xeracións galegas. “Por eles tamén nós somos nós”.

A ela pertencen tres xigantes da cultura galega: Castelao, Otero Pedrayo e Risco. Castelao é o símbolo de Galicia, Vicente Risco o primeiro gran teórico do nacionalismo galego e Otero Pedrayo a figura intelectual máis titánica que produciu esta Terra. Só lles faltaba un mártir, e ese foi Alexandre Bóveda.
Na primeira metade do século pasado, nun contexto de agudo atraso socioeconómico e
indixencia educativo-cultural da maioría da poboación, unha minoría intelectual púxose
á fronte da rexeneración galeguizadora do país.
Os seus predecesores: As Irmandades da Fala. O Seminario de Estudos Galegos. A revista Nós foi o seu órgao de difusión e o que lles deu nome.

2. Os grandes persoeiros da xeración “Nós”:
-Ramón Cabanillas (1876-1959). O “avó” da xeración.
-Antón Losada Diéguez (1884-1929). O mentor.
-Antón Vilar Ponte (1881-1936). Xornalística e político das Irmandades da Fala.
-Florentino Cuevillas (1886-1958). O investigador das orixes da cultura galega.
-Vicente Risco (1884-1963). A obra e a cosmovisión risquiá.
-Ramón Otero Pedrayo (1888-1976). “A imaxe máis completa de Galicia” (Carballo Calero). A obra e a cosmovisión oteriana. Actualidade de Otero.
-Castelao (1886-1950). O símbolo moderno da identidade galega, o ser testemuñante, a
indignación ética. Debuxante, político e escritor. Actualidade de Castelao.

3. Carballo Calero e a xeración Nós.

O palestrante, o profesor universitario e escritos, teólogo e pensador VICTORINO PÉREZ PRIETO, é especialista en temas de cultura galega, sobre todo na Xeración “Nós” e en Prisciliano. Tamén é especialista en Raimon Panikkar, sobre quen fixo as Teses de Doutoramento en Filosofía (USC) e Teoloxía (UPSA).
Estudou Filosofía e Teoloxía en Santiago; doutorouse en Teoloxía na Universidade Pontificia de Salamanca e en Filosofía na Universidade de Santiago.
Foi moitos anos profesor de Instituto; logo deu clases nas Universidades de A Coruña e
Santiago de Compostela. Foi varios anos profesor e investigador na Universidade de San
Buenaventura-Bogotá (Colombia) e actualmente é docente na Universidade de La Salle-Madrid.
Compo conferenciante, ten impartido numerosas conferencias en Galicia, España, Italia, Colombia, México…
É membro da “Asociación de Escritores en Lingua Galega”, do “Seminario Galego de Educación para a Paz”, da “Asociación de Teólogos Juan XXIII”, de “CIRPIT” (Centro Interculturale Raimon Panikkar- Italia), de “Partenia au dela des frontières” (Francia), e doutras.
Ensaísta e publicista en revistas e xornais, foi colaborador habitual nos diarios El Progreso,
Diario de Ferrol e La Voz de Galicia. Foi director da revista Irimia e pertence ao Consello de
Redacción da revista Encrucillada. Ten colaborado noutras revistas galegas (A Nosa Terra,
Tempos, Grial, Agora de Filosofia, Terra e Tempo, Galegos...), españolas (Sal Terrae, ‘Ilu, El
Ciervo, Dialogal, Alandar...) e extranxeiras (Theologica Xaveriana-Bogotá, Actualidades
Pedagógicas-Bogotá, CIRPIT review-Milano, Complessitá-Messina...).
Publicou máis de vinte libros individuais, en galego e castelán; entre eles: A xeración Nós (Vigo, 1988), Do teu verdor cinguido (A Coruña, 1997), Con cordas de tenrura (Vigo, 2000),
Contra a síndrome N.N.A. Unha aposta pola esperanza (Vigo, 2005); Os ríos pasan cheos de
Deus. Poesía religiosa en galego (Noia, 2007), Más allá de la fragmentación de la teología el
saber y la vida (Valencia, 2008), Dios, hombre, mundo (Barcelona, 2008), Prisciliano na
cultura galega (Vigo, 2010), Prisciliano e o priscilianismo (A Coruña, 2012), La búsqueda de
la armonía en la diversidad (Estella, 2014), Espiritualidad ecológica (Saarbrücken-Germany
2016), Diccionario panikkariano (Barcelona 2016), Prisciliano, um cristâo livre (Braga 2017).
Tamén ten colaborado en máis de corenta libros, entre os que salientan: O Ensino da lingua: por un cambio de rumo (A Coruña 1995); Manuel María (Lugo 2001), Diálogos nun camiño da
cultura Europea (A Coruña 2007), Diccionario Enciclopedia do Pensamento Galego (Vigo
2008). O Pensamento Luso-Galaico-Brasileiro 1850-2000 (Lisboa 2009), Da Galicia de Balbino á Galicia de Hoxe (Pontevedra 2011); A Religião em Movimento (Braga 2014), Galegos Universais (A Coruña 2016).

0 Comentários

Nós: "ser diferente é ser existente": audiovisual e visita guiada

9/1/2020

0 Comentários

O venres, 10 de xaneiro de 2020, haberá unha visita guiada á EXPOSICIÓN "NÓS DE ONTE A HOXE: 100 ANOS DE HISTORIA", comisariada polo profesor Carlos Bernárdez.
Esta exposición está organizada pola FEDERACIÓN DE ASOCIACIÓNS CULTURAIS GALIZA CULTURA e con ela conmemórase o centenario dunha iniciativa singular e decisiva na historia contemporánea da Galiza: o nacemento da revista Nós, revista de alta cultura que coloca a lingua, as artes e a ciencia galegas nun nível privilexiado de calidade, e cuxo primeiro número ve a luz o 30 de Outubro de 1920.
A exposición leva como lema: SER DIFERENTE É SER EXISTENTE, e realiza un percurso pola significación e a obra dos principais persoeiros da Xeración Nós: VICENTE RISCO, CASTELAO, RAMÓN OTERO PEDRAIO, ÁNXEL CASAL... con atención especial, e lóxica conexión xeracional, á figura de RICARDO CARVALHO CALERO, dedicatario do próximo Día das Letras Galegas 2020, testemuña excepcional desta época e estudioso constante da obra do Grupo Nós.
O próximo venres, 10 de xaneiro de 2020, ás 18:00 horas, no Museo do Pobo Galego, onde se encontra a exposición, comezarase coa proxección do audiovisual de 7 minutos, que acompaña e completa os textos. A seguir, o profesor Carlos Bernárdez, comisario da exposición, fará unha visita guiada, que durará sobre unha hora.

0 Comentários

reivindicarmos Carvalho calero

palestra de Victorino pérez prieto sobre a xeración nós

Nós: "ser diferente é ser existente": audiovisual e visita guiada

O Galo

Arquivos

Haz clic aquí para editar.

Categorías